„Ég er bara búin á því á kvöldin“

Halldóra Mogensen, þingmaður Pírata, steig í pontu á Alþingi og óskaði eftir því að þingmenn fengju að vita fyrr hvaða mál verða á dagskrá þingsins.

Það myndi auðvelda allan undirbúning fyrir þau mál sem eru tekin á dagskrá. 

„Ég veit ekkert hvaða mál verða á dagskrá á morgun,“ sagði Halldóra og bætti við: „Ég get ekki unnið á kvöldin, ég er bara búin á því á kvöldin, búin að svæfa krakkana og fleira.“

Hún sagði það sýna virðingu við þingmenn að geta haft dagskrána tilbúna fyrr.

Steingrímur J. Sigfússon, forseti Alþingis, sagði gagnrýni sem þessa oft réttmæta. Í þessu tilviki eigi hún þó ekki rétt á sér því dagskrá fundarins í dag hafi legið fyrir á föstudaginn.

Unnur Brá Konráðsdóttir, þingmaður Sjálfstæðisflokksins og fyrrverandi forseti Alþingis, beindi því til þingmanna að líta í eigin barm. Þingmenn þurfi að koma sér betur saman um hversu mikinn tíma þeir vilji áætla í umræður.

Jón Þór Ólafsson, þingmaður Pírata, sagði gagnrýni Halldóru réttmæta. „Eigum við ekki bara að gera þetta betur?“ spurði hann og óskaði eftir því að fá dagskrána fyrr í framtíðinni. 

Steingrímur J. Sigfússon. mbl.is/Ófeigur

• 1 blogg um fréttina

Bloggað um fréttina

• Jóhannes Ragnarsson: Að vola utan í Steingrími J.