Héraðsdómur Reykjavíkur framlengdi í dag gæsluvarðhald yfir öðrum mannanna sem handteknir voru í síðustu viku í vegna rannsóknar á innflutningi fíkniefna í sendingu sem merkt var Skáksambandi Íslands.
Var gæsluvarðhaldið framlengt um fimm daga yfir þeim manni, en hinum hefur verið sleppt úr haldi. Margeir Sveinsson, hjá rannsóknardeild lögreglunnar á höfuðborgarsvæðinu, segir í samtali við mbl.is þann sem enn er í haldi á grundvelli rannsóknarhagsmuna hafa verið handtekinn við komuna til landsins í síðustu viku.
Hann tjáir sig hins vegar ekki um það hvort sá maður hafi verið að koma frá Malaga, en Fréttablaðið hefur áður greint frá því að maðurinn hafi verið handtekinn í Malaga á Spáni, í tengslum við eiginkonu hans sem hryggbrotnaði og lamaðist eftir fall, en var sleppt að lokinni yfirheyrslu.
Tveir eru nú í haldi vegna málsins, en sá sem lengst hefur setið í haldi vegna málsins sætir nú gæslu á grundvelli almannahagsmuna.