Stundin og Reykjavík Media voru rétt í þessu sýknuð af kröfu þrotabús Glitnis um staðfestingu á lögbanni á umfjöllun miðlanna upp úr gögnum sem fjölmiðlarnir höfðu undir höndum innan úr fallna bankanum. Var öllum kröfum Glitnis hafnað og fengu Stundin og Reykjavík Media dæmdar 1,2 milljónir króna í málskostnað hvort.
Þrotabú Glitnis fór fram á lögbann á fréttaflutning Stundarinnar og Reykjavík Media sem byggði á gögnum innan úr fallna bankanum sem fjölmiðillinn hafði undir höndum. Samþykkti sýslumaðurinn í Reykjavík beiðni þrotabúsins 16. október í fyrra.
Röksemdir Glitnis HoldCo fyrir því að lögbannið verði staðfest eru þær að fjölmiðlarnir hafi lýst því yfir að ekki væri búið að birta allar fréttir úr gögnunum sem þeir hefðu viljað þegar lögbannið var sett á. Þá fari birting gagnanna gegn ákvæðum laga um persónuvernd og meðferð persónuupplýsinga og frekari birting geti leitt til mögulegrar skaðabótaskyldu félagsins.
Stutt var til alþingiskosninga er sýslumaður staðfesti lögbannskröfuna, en umfjöllun Stundarinnar og Reykjavík Media hafði að miklu leyti snúist um viðskipti Bjarna Benediktssonar, formanns Sjálfstæðisflokksins, við Glitni í aðdraganda hruns íslenska fjármálakerfisins haustið 2008.
Kærðu Stundin og Reykjavík Media úrskurð sýslumanns og var tekist á um málið í héraðsdómi í upphafi árs.
Ingibjörg Dögg Kjartansdóttir, ritstjóri Stundarinnar, sagði í samtali við mbl.is 20. október að í þessu máli væri ekki aðeins vegið að tjáningarfrelsinu og grafið undan stöðu frjálsra fjölmiðla og rannsóknarblaðamennsku, heldur væri verið að beita valdi til að koma í veg fyrir að fólkið fái upplýsingar sem það ætti rétt á.
Fjölmargir fordæmdu lögbannið, til dæmis stjórn Blaðamannafélags Íslands. Í yfirlýsingu félagsins 18. október sagði að það væri stóralvarlegt mál að leggja hömlur á tjáningarfrelsi í lýðfrjálsum löndum og enn alvarlegra þegar það væri gert í aðdraganda almennra þingkosninga.
Bjarni Benediktsson sagðist einnig ósáttur með lögbannið og sagði að menn gætu farið að spyrja sig spurninga um hvort verið væri að þjóna honum með setningu lögbannsins. Sagðist hann aldrei á sínum stjórnmálaferli hafa látið sér detta í hug að láta skerða tjáningarfrelsi manna þegar fjallað væri um opinberar persónur eins og hann. Bjarni sagði aftur á móti alvarlegt ef gögn hefðu lekið út úr fjármálakerfinu í stórum stíl um fjárhagsmálefni þúsund Íslendinga.