Hópur Íslendinga, þar á meðal Magnús Ver Magnússon, leikur í nýrri auglýsingu bandaríska bílaframleiðandans Dodge sem var sýnd í hálfleik Ofurskálarinnar, úrslitaleiks ameríska fótboltans, í nótt.
Auglýsingin var að mestu tekin upp hér á landi og þar eru Íslendingarnir í hlutverki víkinga á leið til borgarinnar Minneapolis, þar sem úrslitaleikurinn var haldinn, á Dodge Ram-jeppa.
Heimalið borgarinnar Minnesota er einmitt kallað Minnesota Vikings.
Á leiðinni syngja þeir hástöfum lag Queen, We Will Rock You.
Íslenskt landslag kom einnig við sögu í annarri auglýsingu sem var sýnd í hálfleik Ofurskálarinnar frá flugfélaginu Turkish Airlines.
Auglýsingahléin í hálfleik Ofurskálarinnar eru afar dýr og bíða margir spenntir eftir því að sjá hvað auglýsendur hafa fram að færa í hvert sinn.
Ljóst er að landkynningin sem Ísland hlaut með auglýsingunum tveimur var afar góð enda milljónir manna sem fylgjast með úrslitaleiknum á ári hverju.