Margs konar ávinningur af styttri vinnuviku

„Þó að vinnan göfgi manninn gerir frítíminn það líka og samvera með fjölskyldunni. Sumir vinna allt of mikið og sjá eftir því síðar,“ sagði Halldór Halldórsson, borgarfulltrúi Sjálfstæðisflokks og formaður Sambands íslenskra sveitarfélaga, á málþingi á vegum Reykjavíkurborgar og BSRB í dag.

Hann sagðist fagna tilraunum á vegum sveitarfélaga um styttingu vinnuvikunnar, þær væru grundvöllur breytinga og reynslan hefði verið góð, en stytting vinnuvikunnar væri þó að lokum kjarasamningsatriði.

Eins og áður hefur komið fram var á málþinginu tilkynnt um mikla stækkun tilraunaverkefnis Reykjavíkurborgar um styttingu vinnuvikunnar, en alls munu 2.200 starfsmenn taka þátt í öðrum áfanga verkefnisins og stytta vinnuvikuna úr 40 stundum niður í 37-39 stundir.

Frétt af mbl.is

2.200 manns stytta vinnuvikuna

Aukin lífsgæði fylgja styttingunni

Ester Halldórsdóttir, teymisstjóri í félagslegri heimaþjónustu hjá þjónustumiðstöð Árbæjar og Grafarholts, lýsti sinni upplifun af þátttöku í verkefninu sem stjórnandi. Sem starfsmaður í fullu starfi hefur hún fengið fjórar klukkustundir í afslátt af vikulegri mætingaskyldu og því unnið 36 stundir á viku.

„Ég vinn 46 vinnuvikur á ári og það gerir alveg 184 klst. á ári, 23 daga í það heila,“ sagði Ester og bætti við að hún gæti gert ýmislegt á þessum 23 heilu vinnudögum sem styttingin skilar henni.

Hún sagði styttinguna hafa kallað á samræmingu innan vinnustaðarins. „Það geta ekkert allir gengið út kl. 12 á föstudegi eða ekki mætt fyrr en 12 á mánudegi,“ sagði Ester. Hún viðurkennir að það hafi verið svolítið púsl og að starfsmenn hafi þurft að fóta sig saman með það að markmiði að gera vinnuna skipulegri og teymisvinnu markvissari.

Ester segir minna „skrepp“ hafa fylgt styttingunni og að því fylgi ávinningur fyrir vinnustaðinn, auk þess sem starfsmönnum líði betur þegar þeir geti skipulagt erindi sem þarf að sinna á vinnutíma innan styttingarinnar.

„Það veldur minni streitu hjá starfsmönnunum þegar þeir þurfa ekki að fara til næsta yfirmanns og biðja um að fá að skreppa,“ segir Ester.

Hún segir aukin lífsgæði hafa verið hennar persónulegi ávinningur af styttri vinnuviku.

„Ég hef getað nýtt tímann vel,“ segir Ester, en hún er í námi og fer gjarnan á bókasafnið í styttingunni, til að þurfa ekki að læra um kvöldið. Einnig hefur hún getað notað tímann til að styðja aldraðan föður sinn, fara með hann í læknisheimsóknir og fleira.

Henni finnst framtakið frábært og þakkar Reykjavíkurborg fyrir að ráðast í það, auk þess að hvetja önnur sveitarfélög og fyrirtæki til þess að gera slíkt hið sama.

Fyrirtæki tók upp sex tíma vinnudag með góðum árangri

Margeir Steinar Ingólfsson, stjórnarformaður Hugsmiðjunnar, kom og kynnti verkefni fyrirtækisins um sex klukkustunda vinnudag, sem staðið hefur yfir í tvö ár.

Niðurstöðurnar hafa nánast verið lygilega góðar, en greint var frá þeim á vefsíðu fyrirtækisins í gær. 25 starfsmenn starfa hjá Hugsmiðjunni.

Þar kemur fram að framleiðni hafi aukist um 23%, veikindafjarvistum fækkað um 44% og starfsánægja allra starfsmanna aukist.

„Aukinn frítími hefur skilað sér í betri heilsu, aukinni hugarró og einbeitingu á vinnutíma,“ sagði Margeir.

Fram kom í máli hans að starfsmenn og hluthafar fyrirtækisins hafi ekki allir talið fyrirkomulagið líklegt til árangurs í upphafi, en gerður hafi verið óformlegur samningur við starfsmenn um að breyta vinnumenningunni. Þegar starfsmenn mæti til vinnu séu þeir að vinna, ekki að taka persónuleg símtöl eða skreppa frá vinnu til að sinna erindum.

Margeir Steinar Ingólfsson hélt erindi um árangur Hugsmiðjunnar af sex klukkustunda vinnudegi. mbl.is/Arnar Þór

Þannig sé hægt að skila aukinni framleiðni, auk þess sem það hafi sýnt sig að 8-12 klukkustunda vinnudagur sé einfaldlega ekki góður fyrir fólk.

„Þegar við vinnum svona mikið, mun eitthvað klikka,“ sagði Margeir. Hann sagði líklegra að fyrirtækið stytti vinnudag starfsmanna enn frekar en að snúið verði aftur til átta tíma vinnudags.

Hreyfing og hvíld lykilatriði fyrir andlega heilsu

Dr. Ólafur Þór Ævarsson, geðlæknir frá Forvörnum, hélt erindi um sálfélagslega vinnuvernd, vinnutíma og streitu. Hann sagði „faraldur af streitu“ nú geisa í Evrópu og að sá faraldur muni berast hingað.

Við því þurfi að bregðast með því að huga að félagslegum og andlegum vinnuverndarþáttum. Hann sagði rannsóknir sýna að eitt það allra mikilvægasta fyrir starfsfólk væri að geta haft áhrif á vinnuumhverfi sitt.

„Þeim mun meiri ábyrgð sem þú hefur, því mikilvægara er að þú getir stjórnað því sjálfur,“ sagði Ólafur Þór. Einnig sé mikilvægt að fá stuðning og hvatningu í starfi og að starfsmenn upplifi að álag þeirra í starfi sé í samræmi við kjör þeirra, ekki bara launakjör heldur einnig önnur.

Hann sagði þá sem leita sér hjálpar vegna streitu og álags oft vilja fá pillur til að bæta líðan sína. Margir verði hálfsúrir þegar læknar veiti þau svör að hreyfing og hvíld sé besta meðalið. Stytting vinnuvikunnar geti verið liður í að bæta andlega heilsu.

„Með styttingu vinnutíma er hægt að koma inn meiri hreyfingu, meiri hvíld og meiri tíma með fjölskyldunni,“ sagði Ólafur Þór.

• Blogga um frétt