Þeir Oliver Aron Jóhannesson og Hilmir Freyr Heimisson urðu í dag Norðurlandameistarar í sínum aldursflokkum í skák, Oliver í U20 og Hilmir Freyr í U17. Mótið var haldið í finnsku borginni Vierumäki að þessu sinni og var teflt í fimm flokkum.
Oliver Aron hlaut 4,5 vinninga af sex mögulegum og Hilmir Freyr hlaut fimm vinninga af sex. Þá komst Jón Kristinn Þorgeirsson einnig á verðlaunapall en hann endaði í þriðja sæti í U20-flokknum með fjóra vinninga.