Eldur í snekkju við Sjóminjasafnið

Tilkynning barst um eld í snekkju við bátabryggjuna hjá Sjóminjasafninu um hálfellefuleytið í morgun. Slökkvilið var svo varla komið á staðinn þegar útkall barst um eld í íbúð við Ránargötu.

Samkvæmt upplýsingum frá slökkviliðinu á höfuðborgarsvæðinu hafði kraumað einhver eldur í snekkjunni um tíma í morgun. Stór snekkja lá við hlið þeirra sem eldurinn var í og hefði orðið mikið tjón ef eldurinn hefði náð að breiða úr sér. Búið er að slökkva eldinn, ekki liggur enn fyrir hve mikið tjónið er.

Er tilkynningin barst um eld á Ránargötu nokkrum mínútum eftir að slökkviliðið kom á vettvang var öðrum bílnum snúið við. Þar reyndist vera pappír á eldavél og hefðu að sögn slökkviliðsins ekki  liðið margar mínútur þar til þar hefði orði mikill eldur. Slökkviliðsmenn náðu hins vegar að slökkva eldinn snarlega og reykræsta íbúðina.

• Blogga um frétt