Á síðustu tveimur dögum eða 48 klukkustundum hafa mælst 1.238 jarðskjálftar við Grímsey eða á stóra Tjörnesbrotabeltinu. Af þeim hafa 12 skjálftar verið stærri en þrír af stærð, samkvæmt Veðurstofu Íslands. Jarðskjálftahrinur hafa verið mjög tíðar í nágrenni Grímseyjar undanfarin misseri.
Frétt mbl.is: Þrír yfir þrjú stig á hálftíma
Jarðskjálftahrina um 10-12 km norðaustan við Grímsey hefur staðið nær óslitið frá 14. febrúar og um hádegi þann 16. febrúar höfðu hátt á annað þúsund skjálftar mælst á svæðinu.
„Það hefur verið óvenjumikið af skjálftum á þessu svæði það sem af er ári,“ segir Sigþrúður Ármannsdóttir, sérfræðingur Veðurstofu Íslands, í samtali við mbl.is. Þetta er mesta skjálftahrina á þessu svæði síðan í apríl 2013 þegar kröftug hrina varð í kjölfar skjálfta af stærðinni 5,5 á svipuðum slóðum.
Sigþrúður tekur fram að á GPS-mælingum sé enga kvikuhreyfingu að sjá en slíkt gefur vísbendingu um gos.
Frétt mbl.is: Íbúar í Grímsey rólegir yfir skjálftahrinunni
Rúmlega 10 skjálftar yfir þrír að stærð hafa mælst og þann 15. febrúar kl. 19:37 mældist skjálfti af stærð 4,1. Sumir þessara skjálfta hafa fundist í Grímsey.
Sjá nánar í frétt Veðurstofu Íslands, Skjálftahrina við Grímsey.