Opið verður í Bláfjöllum og Skálafelli frá klukkan 10 til 17 í dag. Veður á svæðunum er gott og spáin fyrir daginn góð en í nótt kyngdi niður snjó á höfuðborgarsvæðinu.
Fram kemur í tilkynningu að öll helsta þjónusta sé til staðar á bæðum svæðum; veitingasala og skíðaleiga auk þess sem gönguspor hefur verið lagt á báðum stöðum.
Skíðasvæðið í Skarðsdal á Siglufirði verður opið frá 10 til 16. Veður er einnig mjög gott þar en frost er á bilinu tvær til þrjár gráður og léttskýjað.
Einnig verður skíðasvæðið í Stafdal á Seyðisfirði opið í dag en það verður opið frá 11 til 16. Þar er örlítil gola, tveggja gráðu frost og smá éljagangur sem fer minnkandi samkvæmt spám. Þar mun á morgun opna topplyfta í fyrsta skipti í vetur.