Jörð hélt áfram að skjálfa við Grímsey í kvöld og rétt fyrir miðnætti mældist jarðskjálfti af stærð 3,9 um 12 kílómetra norðaustur af eynni. Alls hafa 11 skjálftar, 3 eða stærri, mælst í grennd við Grímsey síðasta sólarhring.
Skjálftahrinan er sú mesta í Grímsey frá 2013. Hrinan er á stóra Tjörnesbrotabeltinu og hefur jarðskjálftahrina um 10-12 km norðaustan við Grímsey staðið nær óslitið frá 14. febrúar.
Sigþrúður Ármannsdóttir, sérfræðingur á Veðurstofu Íslands, sagði í samtali við mbl.is fyrr í dag að óvenjumikið hefði verið af skjálftum á svæðinu það sem af væri ári.
Frétt mbl.is: Mesta skjálftahrina í Grímsey frá 2013