Slökkviliðið á höfuðborgarsvæðinu hefur haft í nógu að snúast í dag. Alls hefur slökkviliðið sinnt um fjörutíu verkefnum í dag, en kalla þurfti út aukaliðsstyrk vegna anna. Öll útköllin nema eitt tengjast vatnsleka. Flætt hefur inn í kjallara um allan bæ, til að mynda í Skógarhlíð þar sem dæla þurfti vatni úr hálffullum bílakjallara í hádeginu.
Þá þurfti að loka nokkrum götum höfuðborgarsvæðisins í dag vegna stórra polla sem gerðu göturnar ófærar.
Þegar mest lét voru átta dælubílar að störfum í einu, en að sögn vakthafandi slökkviliðsmanns hafði slökkviliðið þegar í hádeginu sinnt þrjátíu útköllum. Síðan hefur heldur dregið úr álaginu.