Matvælastofnun telur, á grundvelli ljósmynda og annarra þeirra gagna sem henni hafa borist, meðal annars lýsingum kafara, að litlar líkur séu á því að fiskur hafi sloppið úr sjókvíum fyrirtækisins í síðustu viku í kjölfar þess að tjón varð á tveimur kvíum fyrirtækisins.
Önnur kvíin er í Arnarfirði en hin í Tálknafirði.
Þá telur stofnunin að fyrirtækið hafi brugðist rétt við til að fyrirbyggja frekara tjón. Segir í tilkynningu frá MAST að farið verði í eftirlitsferð hjá Arnarlaxi við fyrsta tækifæri og að frekari úttekt verði þá gerð á sjókvíum fyrirtækisins og fyrrnefndum viðbrögðum þess.
Fiskistofu var einnig tilkynnt um tjón fyrirtækisins og gögn málsins hafa verið send þangað. Fiskistofa fer með mál er varða slysasleppingar.