Matarmarkaður í Skeifunni í sumar

Lítið gámaþorp verður reist í Skeifunni í sumar en innan þess verður seldur götumatur, pop up-búðir verða opnar, leikir á HM verða sýndir á stórum skjá og tónlistarmenn troða upp.

Þetta verkefni kallast BOX og verður opið frá 1. júní til 29. júlí, á fimmtudögum til sunnudaga. Skipuleggjandi er Róbert Aron Magnússon sem segir að þessi menning hafi verið að sækja í sig veðrið á Íslandi og nú verði farið alla leið.

Gámaþorpið verður þar sem nú er bílastæði við hlið verslunar Rúmfatalagersins, að því er fram kemur í umfjöllun um mál þetta í Morgunblaðinu í dag.