Andlát: Björn Hermannsson

Björn Hermannsson, fyrrverandi tollstjóri, lést að morgni þriðjudagsins 13. mars síðastliðinn, á nítugasta aldursári.

Björn fæddist á Ysta-Mói í Fljótum í Skagafirði 16. júní 1928, sonur Hermanns Jónssonar, bónda og hreppstjóra, og Elínar Lárusdóttur húsfreyju.

Björn lauk stúdentsprófi frá Menntaskólanum á Akureyri 1949 og embættisprófi í lögfræði frá Háskóla Íslands 1955. Hann tók virkan þátt í félagsmálum og var á háskólaárum m.a. formaður Stúdentaráðs. Árið 1957 hóf hann störf í fjármálaráðuneytinu, fyrst sem fulltrúi og síðar skrifstofustjóri, þar til hann var skipaður tollstjóri í Reykjavík frá 1. janúar 1973. Því embætti gegndi hann til starfsloka 1998.

Eiginkona Björns er Ragna Þorleifsdóttir hjúkrunarkona, fædd í Hrísey 1929. Þau eignuðust fimm börn, Þorleif látinn, Þóru, Gústaf Adolf, Hermann og Jónas. Fyrir átti Björn, Lárus Má, nú látinn. Barnabörn eru 16 talsins og barnabarnabörn eru 11.