Breskir diplómatar á bak við tjöldin

Rannsóknarteymi að störfum þar sem rússnesku feðginin komust í tæri ...
Rannsóknarteymi að störfum þar sem rússnesku feðginin komust í tæri við eitur. AFP

„Það kæmi mér ekki á óvart að breskir diplómatar væru að vinna bak við tjöldin og færu þess á leit við aðildarríki NATO að þau sýndu Bretlandi samstöðu og mótmæltu framferði Rússa,“ segir Baldur Þórhallsson, stjórnmálafræðingur, um þann möguleika að ríkisstjórnin sniðgangi HM í Rússlandi í sum­ar.  

Ástæðan fyrir því að rík­is­stjórn Íslands íhug­ar að sniðganga heims­meist­ara­mótið í knatt­spyrnu er stuðningur við Breta sem saka Rússa um að hafa eitrað fyr­ir rúss­nesk­um gagnnjósn­ara og dótt­ur hans á breskri grund. Bretar munu ekki senda stjórnmálamenn og þjóðhöfðingja á Heimsmeistaramótið í Rússlandi sem hefst í júní.

Bretar vísa 23 rúss­nesk­um stjórn­ar­er­ind­rek­um úr landi vegna málsins. Baldur bendir á að þessar aðgerðir Breta séu ekki dramatískar og í raun hefðbundin diplómatísk viðbrögð.   

„Ef þetta er rétt sem bresk stjórnvöld og virtir rannsóknarmiðlar halda fram að rússnesk stjórnvöld og rússneska mafían noti efnavopn á götum borga Bretlands og standi á bak við jafnvel 14 undarleg dauðsföll Rússa í Bretlandi þá eru viðbrögð breskra stjórnvalda ekki mjög dramatísk,” segir Baldur. Í því ljósi kæmi það honum ekki á óvart að breskir diplómatar væru að vinna í því að fá önnur ríki til að gera slíkt hið sama. 

Guðlaugur Þór greindi frá því í gær að það væri skýrt að leik­menn og aðdá­end­ur verða á sín­um stað. Baldur bendir á að einstaka þingmenn í breska þinginu hafa kallað eftir því að íþróttamenn sniðgangi leikana. „Við eigum hins vegar eftir að sjá hvernig þessu máli vindur fram,“ segir Baldur. 

Sambærileg umræða kom upp hér á landi árið 2008 þegar Ólympíuleikarnir voru haldnir í Peking í Kína. Ingibjörg Sólrún Gísladóttir, þáverandi utanríkisráðherra, velti því upp hvort íslenskir ráðamenn ættu að sniðganga Ólympíuleikana til að mótmæla framgöngu Kínverja í garð íbúa Tíbet. Hins vegar kepptu íslenskir íþróttamenn á leikunum og íslenskir stjórnmálamenn mættu.   

Baldur Þórhallsson, stjórnmálafræðingur og prófessor við Stjórnmálafræðideild Háskóla Íslands.
Baldur Þórhallsson, stjórnmálafræðingur og prófessor við Stjórnmálafræðideild Háskóla Íslands.
mbl.is

Bloggað um fréttina