Líklegt er að nýtt sölumet hafi verið sett á íslenskum fasteignamarkaði í Bríetartúni 9-11. Íbúðirnar fóru í sölu í síðustu viku og er nú tæplega helmingur seldur.
Miðað við ásett verð á söluvef Höfðatorgs kosta seldar íbúðir rúma 2,3 milljarða. Þar af kosta tvær þeirra 99,9 milljónir. Greinendur á fasteignamarkaði hafa að undanförnu lýst yfir efasemdum um eftirspurn eftir dýrari íbúðum í miðborg Reykjavíkur. Miðað við eftirspurnina í Bríetartúni er sá markaður á hreyfingu.
Í umfjöllun um mál þetta í Morgunblaðinu í dag segir Pétur Guðmundsson, stjórnarformaður Eyktar, trúnað gilda um kaupendur íbúðanna. Kaupendahópurinn sé fjölbreyttur. Þar séu bæði einstaklingar og fjárfestar.