Fyrstu vorboðarnir litu dagsins ljós í Húsdýragarðinum nýverið þegar lítil huðna og hafur komu í heiminn. Huðnan Frigg var fyrst til að bera golsuflekkóttri huðnu að kveldi 20. mars og í morgun bar huðnan Garún svartflekkóttum hafri.
Faðir kiðlinganna er hafurinn Djarfur sem fluttist í Húsdýragarðinn í haust frá bænum Háafelli í Hvítársíðu. Þetta kemur fram á Facebook-síðu Húsdýragarðsins þar sem jafnframt er greint frá því að fleiri myndir af kiðlingunum eru væntanlegar.