Náttúruverndarsamtök Suðurlands og Landvernd hafa kært nýtt framkvæmdaleyfi vegna Brúarvirkjunar og krefjast stöðvunar framkvæmda. Ákvörðun sveitarstjórnar Bláskógarbyggðar um að veita HS Orku leyfi til að reisa 9,9 MW vatnsaflsvirkjun í Tungufljóti er kærð.
Þetta kemur fram í fréttatilkynningu frá Landvernd. Sigurður Ingi Jóhannsson samgönguráðherra tók á föstudag skóflustungu að byggingu virkjunarinnar í efri hluta Tungufljóts í Biskupstungum.
„Samtökin telja að málsmeðferð Bláskógabyggðar við veitingu nýs framkvæmdaleyfis sé andstæð lögum og að á henni séu bæði form- og efnisannmarkar sem eigi að leiða til ógildingar. Krafa samtakanna um stöðvun framkvæmda byggir m.a. á frétt í Morgunblaðinu frá í gær (26. mars 2018) um að byrjað verði að setja niður vinnubúðir á virkjunarstað í þessari viku og að strax eftir páska muni starfsmenn Ístaks hefjast handa um framkvæmdir,“ segir í tilkynningu Landverndar.
Landvernd telur að ummæli Ingólfs Margeirssonar, landaeiganda á Brú, í Morgunblaðinu í dag séu röng. Þar segir Ingólfur meðal annars að „virkjað sé í sátt við náttúru og samfélag“ og að framkvæmdin hafi „mjög lítil áhrif á umhverfið.“