16-18 ára fá að kjósa í borginni

Athugasemd frá ritstjórn mbl.is. Rétt er að taka fram að fréttin er aprílgabb fréttastofunnar þetta árið.

Ungt fólk 16-18 ára mun geta tekið þátt í sveitarstjórnarkosningum í Reykjavík þann 26. maí næstkomandi. Samþykkt hefur verið í borgarráði að veita hópnum rétt til að kjósa í ráðgefandi kosningu og getur fólk skráð sig til þátttöku á netinu. Frambjóðendur Sjálfstæðisflokks mótmæla ákvörðuninni.

„Fyrir okkur er þetta bara lýðræðisspursmál og okkur finnst Alþingi hafa dregið lappirnar með þetta mál og ákváðum þess vegna að gera þetta einhliða að þessu sinni,“ segir Dagur B. Eggertsson í samtali við mbl.is.

Eftir er að útfæra hver er þýðing þess að kosningin sé ráðgefandi eins og það er orðað í tilkynningu borgarinnar en að þetta sé þó í takt við stefnu borgarinnar þar sem aldurshópurinn geti greitt atkvæði í kosningum á vefnum Betri Reykjavík.

Ungt fólk á aldrinum 16-18 ára sem hefur lögheimili í Reykjavík getur skráð sig til þátttöku á vef borgarinnar í meðfylgjandi tengli, en forráðamenn geta einnig skráð börn sín.

„Ég held að það sé mikilvægt fyrir lýðræðisþátttöku í öllum samfélögum að ungt fólk fái rödd og hafi sitt að segja um kosningar og hvaðeina. Ungt fólk 16 ára og eldra getur kosið í Betri Reykjavík og haft þannig áhrif á ákvarðanatöku í borginni og umhverfið,“ segir Líf Magneudóttir borgarfulltrúi og oddviti Vinstri Grænna í borginni.

Frambjóðendur Sjálfsstæðisflokks í borginni gagnrýna ákvörðunina þó harðlega. Óljóst sé hvað felist í að kosningin sé ráðgefandi en þó helst með hvaða hætti borgin beitir sér í málinu. „Ég mun alltaf fagna auknu lýðræði og ég fagna því að fá nýja kjósendur inn. En mér finnst skrýtið þegar ákvörðun er tekin um að auka lýðræði en ákvörðunin er tekin með þessum ólýðræðislega hætti,“ segir Hildur Björnsdóttir sem skipar 2. sæti á lista flokksins í kosningunum.

Ekki náðist í Eyþór Arnalds oddvita flokksins við vinnslu fréttarinnar en hann er í fríi erlendis.

Skráning á vef Reykjavíkurborgar. 

mbl.is

Bloggað um fréttina