Karlmaður var á föstudaginn fyrir páska dæmdur í héraðsdómi í fjögurra ára fangelsi og til að greiða 2,5 milljónir í miskabætur fyrir ítrekuð kynferðisbrot gegn fósturafabarni sínu þegar hún var á aldrinum þriggja til ellefu ára.

Í dómi Héraðsdóms Norðurlands eystra kemur fram að maðurinn hafi frá árinu 2006 til 2014 eða 2015 látið stúlkuna snerta kynfæri sín og látið hana fróa sér í nokkur skipti. Þá hafi hann strokið brjóst hennar og kynfæri innanklæða og farið með fingur inn í leggöng hennar.

Neitaði að tjá sig um sakarefni

Maðurinn neitaði að tjá sig um sakarefni fyrir dómi að öðru leyti en að neita sök, en framburður stúlkunnar, fóstursystur hennar, fósturforeldra, starfsmanna barnaverndarnefndar og barnageðlæknis voru lögð til grundvallar ákvörðunar dómsins. Benda þau öll til þess að maðurinn hafi brotið gegn stúlkunni.

Í dóminum kemur fram að stúlkan hafi árið 2016 greint sálfræðingi barnaverndar frá brotum mannsins og í framhaldinu hafi starfsmaður nefndarinnar ritað kæru til lögreglu. Hófust afskipti barnaverndar af málefnum stúlkunnar eftir tilkynningu frá skólanum um áhyggjur af líðan hennar í skólanum.

Brotin hófust þegar stúlkan var þriggja ára

Við skýrslutöku sama ár sagði hún að brotin hefðu náð aftur til þess þegar hún var þriggja ára gömul. Fyrst hefði verið um snertingar að ræða sem hann hafði látið hana framkvæma, en síðar grófari brot. Þegar þú hafi verið ellefu ára hafi hann svo farið að þreifa á henni innanklæða og á kynfærum.

Samkvæmt vottorði frá barnageðlækni kemur fram að stúlkan hafi átt við vanlíðunar- og hegðunarvanda. Hún hafi greint frá kynferðisofbeldinu á trúverðugan hátt og þeim afleiðingum sem það hafi átt á sjálfsmynd hennar. Umsjónarkennari stúlkunnar greindi einnig frá því að líðan stúlkunnar hefði farið versnandi og hún átt lítil sem engin samskipti við bekkjarsystkini sín.

Hafði óviðeigandi hegðun við fóstursystur stúlkunnar

Dóttir mannsins og fósturmóðir stúlkunnar gaf einnig skýrslu fyrir dómi og sagðist ekki hafa vitað af brotunum fyrr en hún hafi sagt sér frá þeim. Hún hafi orðið hissa, en tekið eftir því að aðrar dætur hennar hafi vikið frá afa sínum þegar hann var að kveðja þær. Þá hafi önnur dóttir hennar einnig greint frá því að maðurinn hafi þuklað á henni og staðfesti hún að maðurinn hafi sýnt sér óviðeigandi hegðun sem barn. Hann hefði nuddað sér upp við hana þannig að henni hefði þótt það óþægilegt, hún hefði ekki viljað vera nálægt honum og alltaf þegar hann hefði komið hefði hún forðað sér.

Brotnaði saman við bakarí

Fósturforeldrar stúlkunnar sögðu bæði fyrir dómi að stúlkan hefði brotnað saman þegar þau hafi ætlað með hana í tiltekið bakarí, en stúlkan sagði fósturafa sinn oft hafa farið með sig þangað áður en þau hafi farið heim saman eftir skóla, þangað sem hann sótti hana oft meðan fósturforeldrar hennar voru í vinnu.

Eins og fyrr segir taldi dómurinn framburð stúlkunnar trúverðugan og að framburður annarra vitna og skýrslur sérfæðinga ýta undir trúverðugleika frásagnar hennar. Er framburður hennar því lagður til grundvallar og talið nægilega sannað að maðurinn hafi gerst sekur um þá háttsemi sem í ákæru málsins greinir.

Eru brot hans sögð alvarleg og til þess fallin að valda miklum þjáningum. Þau hafi staðið yfir í langan tíma og hann hafi engar málsbætur, en litið er til þess að maðurinn sé í hárri elli við ákvörðun refsingar.

Er hann sem fyrr segir dæmdur í fjögurra ára fangelsi og til að greiða 2,5 milljónir króna í miskabætur, auk 1,2 milljón í sakarkostnað.

Tengdar fréttir

Kynferðisbrot

Nauðgaði kærustu sinni og tók það upp

• Landsréttur mildar þriggja ára nauðgunardóm
• Þriggja ára nauðgunardómur staðfestur
• Sýknuð af ákæru um að ljúga til um nauðgun
• Dómur vegna kynferðisbrota árið 2017 óraskaður

» Fleiri tengdar fréttir

• Blogga um frétt