Spánverjar eru sá hópur ferðamanna sem er ánægðastur með Íslandsdvöl sína samkvæmt mælingu Gallup á ánægju ferðamanna í febrúarmánuði. Mældust Spánverjar efstir í Ferðamannapúlsinum með 86,4 stig. Þjóðverjar voru í öðru sæti með 85,6 stig, Ástralar í því þriðja með 83,8 stig, Pólverjar í fjórða sætinu með 83 stig og Bretar í því fimmta með 82 stig.

Frakkar voru hins vegar sú þjóð sem voru síst ánægðir með Íslandsvölina og mældist ánægja þeirra 76,2 stig.

Gallup kannar viðhorf erlendra ferðamanna til Íslands í hverjum mánuði og reiknar svo nefndan Ferðamannapúls út frá niðurstöðunum, en hann mælir heildarupplifun ferðamanna af Íslandsferðinni.

Lítil breyting  var á ánægju erlendra ferðamanna milli mánaða, að því er fram kemur í fréttatilkynningu Gallup.

Þegar litið er til undirþátta Ferðamannapúlsins var engin breyting á upplifun ferðamanna af gestrisni Íslendinga, en allir aðrir þættir mældust lægri í febrúar en í janúar. Mest var lækkunin á mati ferðamanna á því hvort að Íslandsferðin hefði uppfyllt væntingar og lækkaði það mat um þrjú stig milli mánaða og fór úr 78,7 stigum í 75,7 stig.

Ferðamannapúlsinn byggir á fimm spurningum sem mæla heildaránægju ferðamanna, hvort þeir telji Íslandsferðina hafa verið peninganna virði, hvort að ferðin hafi staðist væntingar þeirra, líkur á að þeir mæli með Íslandi sem áfangastað og svo á mati ferðamanna á gestrisni Íslendinga. Mældist Ferðamannapúlsinn í febrúar 82,0 stig af 100 mögulegum og er það einu stigi lægra en í janúar þegar Ferðamannapúlsinn mældist 83,0 stig.

Könnunin er send á netföng ferðamanna sem nýlega hafa farið um Keflavíkurflugvöll. Mánaðarlega er safnað u.þ.b. 1500 svörum og eru niðurstöður vigtaðar eftir þjóðerni.

• 
• Blogga um frétt