Tveimur ferðamönnum var bjargað úr sjálfheldu á Botnsfjalli rétt austan við Arnarstapa á Snæfellsnesi í nótt með aðstoð björgunarsveitarmanna, lögreglunnar og þyrlu Landhelgisgæslunnar.
Tilkynning um tvo ferðamenn í sjálfheldu barst rétt fyrir miðnætti. Þegar lögreglu- og björgunarsveitarmenn voru komnir á svæðið um klukkan 1 í nótt var skollið á svarta myrkur og mátu þeir aðstæður þannig að best væri að óska eftir aðstoð þyrlu Landhelgisgæslunnar.
Samkvæmt upplýsingum frá stjórnstöð Gæslunnar var þyrlan komin á staðinn um klukkan 2.30 í nótt. Um tuttugu mínútum síðar var búið að koma mönnunum niður af fjallinu.
Mennirnir, sem eru erlendir ferðamenn, voru í sjálfheldu í klettabelti í Botnsfjalli og var aðkoman erfið, meira að segja fyrir þyrluna. En það tókst að hífa mennina upp í þyrluna og koma þeim niður þar sem lögreglan tók á móti þeim sem og vinur þeirra sem beið þeirra.
Samkvæmt upplýsingum frá Gæslunni voru mennirnir vel búnir en þeir voru þó aðeins farnir að kólna er björgunin barst.