Ekkert sem benti til strokhættu

Páll Winkel fangelsismálastjóri vonar að flótti fanga úr fangelsinu Sogni …
Páll Winkel fangelsismálastjóri vonar að flótti fanga úr fangelsinu Sogni í nótt hafi ekki þær afleiðingar að föngum fækki í opnum fangelsum því það telur hann vera skref aftur á bak. mbl.is/Hari

Páll Winkel fangelsismálastjóri segir að ekkert hafi bent til þess að Sindri Þór Stef­áns­son væri líklegur til að strjúka úr fangelsinu að Sogni.

„Í opnum fangelsum vistum við einstaklinga sem við treystum til þess að afplána við slíkar aðstæður, það er einstaklinga sem við teljum ekki hættulega umhverfinu í kringum sig,“ sagði Páll í viðtali í Kastljósi í kvöld.

Sindri Þór, sem hefur setið í gæsluvarðhaldi síðan 2. fe­brú­ar vegna gruns um aðild að stórfelldum þjófnaði úr gagna­veri, strauk frá fang­els­inu að Sogni í nótt. Hann fór úr landi klukk­an 07:34 í morg­un með vél Icelandair til Svíþjóðar.

„Það var ekkert sem benti til þess að það væri strokhætta af þessum manni,“ sagði Páll. Hann benti jafnframt á að samsetning fangahópsins á Íslandi geri það að verkum að fangelsismálayfirvöld þurfi að forgangsraða inn í fangelsið. „Það er harðasti kjarni manna sem afplánar fangelsisrefsingar í fangelsum.“ Þá sagði hann það vera 100% frelsisskerðingu að vera vistaður í opnu fangelsi.

Gat átt í samskiptum við hvern sem er

Sindri Þór strauk úr fang­els­inu að Sogni klukk­an eitt í nótt, en lög­reglu var ekki til­kynnt um það fyrr en klukk­an átta í morg­un.

Páll sagði að fyrirkomulagið í opnum fangelsum sé þannig að þar sé borið meira traust til manna. Spurður hvort Sindri Þór hafi getað haft samband við hvern sem er sagði Páll að hann hafi, eins og allir aðrir fangar sem ekki sæta einangrun vegna rannsóknarhagsmuna, getað hringt í þann sem hann sýnist. „Svoleiðis er það og það á að vera svoleiðis.“

Á eftirlitsmyndavélum að Sogni má sjá Sindra Þór fara út um glugga á herbergi sínu, en Páll segir að hægt sé að greina það með góðum vilja. Hann fullyrðir að fangaverðirnir hafi sinnt störfum sínum síðustu nótt. „Þeir voru að gera það sem þeir gera venjulega, að fylgjast með húsinu.“

Páll viðurkennir að mistök hafi mögulega átt sér stað. „Maður getur ekki 100% lesið huga allra sem eru í fangelsum ríkisins. Við getum vissulega metið ýmislegt en það er ekki alltaf hægt að reikna út gjörðir manna,“ sagði Páll.

Þá segir hann málið afar slæmt og vonar hann að það hafi ekki þær afleiðingar að föngum fækki í opnum fangelsum því það telur hann vera skref aftur á bak.

„Það kann að vera að við þurfum að bæta við gæsluna, þá þurfum við að fjölga mönnum, kannski gerum við það. Við erum að vinna þetta eins vel og getum. Þetta mál er vont, ég er ekki ánægður með það,“ sagði Páll.  

mbl.is

Bloggað um fréttina