Leikfangslím innkallað vegna mögulegrar skaðsemi

A4 hefur innkallað Goobands Googoo sem er neonlitað (gult, bleikt og grænt) leikfangaslím. Tilkynning barst í gegnum Rapexkerfið um að slímið stæðist ekki prófanir sem gilda um efnainnihald. Það inniheldur efnið boron sem er talið skaðlegt ef það er í of miklu magni.

Þetta kemur fram á vef Neytendastofu.

Þar segir, að slímið hafi verið í sölu í nokkra mánuði bæði í verslunum A4 og í heildsölu hjá öðrum söluaðilum.

Í tilkynningu frá A4 kemur fram að þeir viðskiptavinir sem hafi keypt Goobands Googoo með vörunúmeri GP074/3 geti skilað því í verslanir eða til söluaðila Goobands Googoo og fengið vöruna endurgreidda. A4 mun ennfremur setja upp auglýsingu í verslun sinni og hjá endursöluaðilum þar sem innköllunin er áréttuð. 

Neytendastofa beinir þeim tilmælum til neytenda að hætta strax notkun þessa slíms og skila því til söluaðila.

• Blogga um frétt