Hæstiréttur hefur samþykkt að veita leyfi til áfrýjunar í máli sem Arnfríður Einarsdóttir dæmdi í Landsrétti. Rétturinn mun því skera úr um hvort Arnfríður hafi verið með réttu handhafi dómsvalds þegar hún dæmdi í málinu.
Þetta kemur fram á vef RÚV. Þar segir ennfremur að stefnt sé að því að dæma í málinu fyrir réttarhlé í júní og fari það því fram fyrir einhver ódæmd mál hjá réttinum.
Fram hefur komið, að ríkissaksóknari hafi mælt með því að fá úrlausn Hæstaréttar um það hvort skipan Arnfríðar hafi verið samkvæmt lögum, en í máli sem nú sé rekið fyrir dómstólum hafi lögmaður krafist þess að Arnfríður víki sæti vegna vanhæfis.
Landsréttur hefur áður úrskurðað að Arnfríði beri ekki að víkja í málinu.
Í málinu er tekist á um brot karlsmanns sem var dæmdur í sautján mánaða fangelsi fyrir margvísleg umferðarlagabrot og brot á reynslulausn. Ríkissaksóknari segir í umsögn um hvort veita eigi áfrýjunarleyfi til Hæstaréttar að það sé engin ástæða til að mæla með áfrýjun vegna niðurstöðu Landsréttar um refsingu. Aftur á móti fallist ríkissaksóknari á að mjög mikilvægt sé að fá úrlausn Hæstaréttar um álitaefnið sem tengist meintu vanhæfi Arnfríðar.