Fyrsta málminum tappað af ofninum

Fyrsta kísilmálminum var í gær tappað af ljósbogaofni kísilvers PCC BakkiSilicon á Bakka við Húsavík. Á ýmsu hefur gengið við upphitun ofnsins en hún hefur þó verið án slysa á fólki og nágrannar verksmiðjunnar hafa ekki orðið varir við mengun frá henni.

Enn er verið að hita upp fyrsta ofninn, Birtu, en Hafsteinn Viktorsson, forstjóri fyrirtækisins, vonast til að hann verði kominn í fullan rekstur um helgina.

„Alltaf eru að koma upp smávægileg vandamál og allt tekur þetta lengri tíma en reiknað var með. Við förum gætilega. Ætlum hvorki að leggja starfsfólk okkar í hættu né leggja of mikið á umhverfið,“ segir Hafsteinn í Morgunblaðinu í dag.