Um þessar mundir er listakonan Ragnhildur Stefánsdóttir, sem m.a. gerði brjóstmyndina af séra Bjarna Þorsteinssyni, tónskáldi og fyrsta heiðursborgara Siglufjarðar, að fullvinna styttu af Gústa guðsmanni, Ágústi Gíslasyni.
Styttan verður steypt í brons í Þýskalandi og reist á Ráðhústorginu á Siglufirði og væntanlega afhjúpuð/vígð á afmælisdegi Gústa þann 29. ágúst næstkomandi.
Sigurvin, áhugamannafélag um minningu Gústa guðsmanns, á veg og vanda af því að minnisvarðinn verði reistur, á 100 ára kaupstaðarafmæli Siglufjarðar, nú Fjallabyggðar.
Við hæfi þykir að styttan verði á Ráðhústorginu í bænum, en þar boðaði Gústi orðið í ein 40 ár.
„Ánægjulegt er að skynja og heyra hve slík gjöf til Siglufjarðarkaupstaðar, á eitt hundrað ára afmæli kaupstaðarins, vekur mikla athygli. Söfnun til að kosta styttuna hefur staðið yfir í stuttan tíma og gengur mjög vel. Erum við fullviss um að hin ýmsu fjárframlög, stór og smá, munu fjármagna gerð styttunnar sem kosta mun um 10 milljónir króna,“ segir í greinargerð frá áhugamannafélaginu Sigurvin.
Opnaður hefur verið reikningur í Arion banka á Siglufirði sem ber heitið Sigurvin, eins og bátur Gústa sem varðveittur er á Síldarminjasafni Siglufjarðar. Ágúst Gíslason var fæddur í Hvammi í Dýrafirði árið 1897. Hann lést árið 1985 og hvílir í Siglufjarðarkirkjugarði.