Skattamál Jóns Ásgeirs Jóhannessonar og Tryggva Jónssonar er nú komið á áfrýjunarskrá Hæstaréttar, en endurupptökunefnd samþykkti í síðasta mánuði beiðni þeirra um að taka málið upp að nýju. Tengist málið skattalagabrotum þeirra og Kristínar Jóhannesdóttur í tengslum við rekstur Baugs og fjárfestingafélagsins Gaums.
Jón, Tryggvi og Kristín voru dæmd árið 2012 til refsingar og greiðslu sekta og sakarkostnaðar vegna skattalagabrot í rekstri Baugs og Gaums, en áður hafði þeim verið gert að greiða sektir með úrskurði yfirskattanefndar á árinu 2007.
Mannréttindadómstóll Evrópu komst að þeirri niðurstöðu að íslenska ríkið hafi brotið á þeim þegar komi að banni við endurtekinni refsimeðferð, þ.e. að refsað sé oftar en einu sinni fyrir sama brot.
Í kjölfar niðurstöðu Mannréttindadómstólsins sendi Jón Ásgeir erindi til endurupptökunefndar með beiðni um að mál hans frá 2012 yrði endurupptekið. Í úrskurði endurupptökunefndar segir að uppfyllt sé skilyrði um endurupptöku um að verulegir gallar hafi verið á meðferð máls þannig að það hafi áhrif á niðurstöðu málsins.
Málið er nú sem fyrr segir komið á áfrýjunarskrá Hæstaréttar, en þá á eftir að setja það á dagskrá réttarins.