Mengun frá kísilverksmiðju United Silicon í Helguvík olli mismikilli ertingu í augum og öndunarvegi hjá þeim sem voru með undirliggjandi öndunarvegasjúkdóma. Þetta er niðurstaða sóttvarnalæknis sem skoðaði áhrif á meintri heilsuspillandi mengun frá verksmiðjunni.
Þá var ekki unnt að meta langtímaáhrif því efnasamsetning mengunarinnar var lítt kunn.
Greint er frá niðurstöðunni í nýrri farsóttaskýrslu sem er að finna á vef Embætti landlæknis.
Fram kemur, að frá upphafi hafi sóttvarnalæknir hvatt íbúa í nærumhverfi verksmiðjunnar, sem töldu sig hafa orðið fyrir heilsuspillandi áhrifum af völdum mengunar frá henni, að leita til lækna heilsugæslunnar til að fá mat á sínum einkennum.
Sóttvarnalækni bárust bæði formlegar og óformlegar tilkynningar frá læknum um þessar skoðanir og kom í ljós að flestir einstaklinganna kvörtuðu um ertingu í augum og öndunarvegi sem oft var ekki hægt að staðfesta með vissu við skoðun en í öðrum tilfellum komu fram einkenni um roða og ertingu í slímhúðum.
Nokkrir einstaklingar með undirliggjandi öndunarfærasjúkdóma kvörtuðu einnig um aukningu á einkennum frá öndunarfærum og þurftu meiri lyfjagjöf en venjulega. Hins vegar var ekki hægt að staðfesta alvarleg einkenni sem rekja mátti til mengunarinnar, að því er fram kemur í skýrslunni.
Sóttvarnalæknir tók saman fjölda greininga ákveðinna öndunarfærasjúkdóma frá Heilsugæslu Suðurnesja þann tíma sem verksmiðjan var starfrækt og greindi ekki aukningu á þessum sjúkdómum. Ennfremur varð ekki vart aukningar á ávísunum astmalyfja til íbúa svæðisins á þessum tíma.