Lilja Alfreðsdóttir, mennta- og menningarmálaráðherra, segir íslensk stjórnvöld harma þá ákvörðun Kaupmannahafnarháskóla að leggja af kennslu í íslensku, bæði forníslensku og nútímaíslensku.
Í umfjöllun um mál þetta í Morgunblaðinu i dag segir Lilja að íslensk stjórnvöld vilji koma að málinu og vinna að lausn í samvinnu við dönsk stjórnvöld svo íslenskukennslan geti haldið áfram.
Kaupmannahafnarháskóli hefur ákveðið að leggja niður kennslu í valgreinunum nútímaíslensku, forníslensku og færeysku frá næsta ári vegna þess hve fáir leggja stund á námið. Frá þessu var greint í Uniavisen sem háskólinn gefur út. Ástæðan er sögð vera sparnaður vegna hagræðingarkröfu stjórnvalda. Umræddar valgreinar standast ekki kröfur skólans um minnst 30 stúdenta í hverjum áfanga. Einungis fjórir til fimm stúdentar hafa valið að leggja stund á þessi fög hverju sinni undanfarin ár.