Einn lést í umferðarslysi í Hestfirði

Einn lést og annar slasaðist þegar sendibifreið valt í Hestfirði í Ísafjarðardjúpi rétt fyrir klukkan fjögur í dag. Neyðarlínunni barst tilkynning klukkan 15:53 í dag um alvarlegt slys og fóru lögreglumenn, sjúkraflutningamenn, slökkviliðsmenn og björgunarsveitarfólk á vettvang. Auk ökumanns var einn farþegi í bifreiðinni. Þetta kemur fram í tilkynningu frá lögreglunni á Vestfjörðum.

Vegna alvarleika slyssins var óskað eftir aðstoð þyrlu Landhelgisgæslunnar sem flutti annan aðilann á sjúkrahús í Reykjavík. Hinn lést af völdum áverka. Báðir aðilarnir eru íslenskir og hefur fjölskyldum þeirra verið tilkynnt um slysið.

Frétt af mbl.is

Einn fluttur til Reykjavíkur með þyrlunni

Veginum var lokað meðan viðbragðsaðilar voru þar að störfum. Vegurinn verður opnaður á næstu mínútum.

Rannsókn á tildrögum slyssins er í höndum lögreglunnar á Vestfjörðum og rannsóknarnefndar samgönguslysa. Ekki er tímabært að gefa frekari upplýsingar um atvikið.