Heimsforeldrar aldrei verið fleiri

Frá neyðarsöfnun UNICEF fyrr á árinu.
Frá neyðarsöfnun UNICEF fyrr á árinu. mbl.is/Árni Sæberg

Heimsforeldrum UNICEF fjölgaði um 3.043 á síðastliðnu ári og eru þeir nú orðnir 27.396 talsins, en það er mesti fjöldi íslenskra heimsforeldra frá upphafi. Þetta kom fram á ársfundi UNICEF í morgun.

UNICEF er barnahjálp Sameinuðu þjóðanna og er leiðandi í hjálparstarfi fyrir börn í heiminum. Stærstur hluti frjálsra framlaga hér á landi, eða um 84%, kemur frá almenningi, svokölluðum heimsforeldrum. Framlög þeirra til UNICEF hér á landi eru þau hæstu í heimi miðað við höfðatölu. 

Engin landsnefnd skilað hærri framlögum

Heildarinnkoma UNICEF á Íslandi var tæpar 663 milljónir króna árið 2017, sem er um 5% vöxtur milli ára, og njóta þúsundir barna góðs af þeim vexti. Þá skilar engin landsnefnd hjá UNICEF í heiminum hlutfallslega hærri framlögum en sú íslenska, að því er fram kemur í ársskýrslu UNICEF á Íslandi.

Á síðastliðnu ári voru jafnframt settar á fót neyðarsafnanir vegna hungursneyða í Suður-Súdan, Jemen, Nígeríu og Sómalíu, neyðarsöfnun fyrir róhingja og neyðarsöfnun UNICEF á Íslandi vegna stríðsins í Sýrlandi hélt áfram. Auk þess var dagur rauða nefsins haldinn 9. júní 2017 þar sem 1.850 nýir heimsforeldrar bættust í hópinn auk þess sem 5,6 milljónir söfnuðust í stökum framlögum frá fyrirtækjum og einstaklingum.

Fyrstu Réttindaskólar UNICEF á Íslandi

Þá veittu fyrstu Réttindaskólar UNICEF hér á landi, Flataskóli og Laugarnesskóli, viðurkenningum sínum viðtöku á starfsárinu og bera forsvarsmenn skólanna verkefninu afar góða söguna. Viðhorfskannanir meðal barna og fullorðinna í Réttindaskólunum bendi til afar jákvæðra áhrifa verkefnisins á þekkingu skólasamfélagsins á mannréttindum barna.

Markmið Réttindaskólanna er að byggja upp lýðræðislegt umhverfi með því að rækta með markvissum hætti þekkingu, leikni og viðhorf sem hjálpar börnum að vera gagnrýnin, virkir og hæfir þátttakendur í nútíma samfélagi. Þau kenni jafnframt börnum að þekkja réttindi sín samkvæmt Barnasáttmála Sameinuðu þjóðanna.

mbl.is