Mál manns á sjötugsaldri sem grunaður er um að hafa banað bróður sínum í uppsveitum Árnessýslu þann 31. mars er nú komið á borð embættis héraðssaksóknara sem mun gefa út ákæru í málinu. Maðurinn hefur setið í gæsluvarðhaldi frá því að málið kom upp.
Í gæsluvarðhaldsúrskurðum málsins hefur komið fram að bróðirinn hafi sjálfur hringt á Neyðarlínuna að morgni 31. mars þar sem hann lýsti hvernig hann og bróðir hans, Ragnar Lýðsson, hefðu lent í átökum um kvöldið eftir að hafa setið að drykkju að heimili hins grunaða að bænum Gýgjarhóli II. Minni hans af atburðum væri óljóst en hinn látni hefði orðið brjálaður, þeir tekist á, en svo hefði rjátlast af hinum látna.
Við skýrslutöku hjá lögreglu bar hinn grunaði við minnisleysi um það sem þeim bræðrum fór á milli en peningalán sem hann veitti hinum látna hefði þó borið á góma. Hann gat ekki gefið haldbærar skýringar á því hvers vegna áverkar hefðu verið á honum sjálfum eða hvers vegna blóð hefði verið á andliti hans, hendi og fötum þegar lögreglu bar að.
Kolbrún Benediktsdóttir, varahéraðssaksóknara hjá embætti héraðssaksóknara, staðfestir við mbl.is að málið sé á þeirra borði, en í frétt Rúv er vísað til orða hennar um að vonandi verði ákæra í málinu gefin út sem fyrst. Frestur til þess að gefa út ákæru í málinu án þess að sleppa hinum grunaða úr varðhaldi er til 23. júní, en þá verða liðnar 12 vikur frá því að málið kom upp.