Rússland er ekki aðili að reglum Evrópusambandsins um reikigjöld farsíma. Af því leiðir að neytendavernd sem felst í Evrópureglugerðinni, svo sem að gjald fyrir netnotkun og símtöl innanlands sé það sama í útlöndum og á Íslandi, er ekki til staðar í Rússlandi.
Þetta kemur fram í tilkynningu frá Póst- og fjarskiptastofun sem beint er að HM-förum. Sama gildi um 50 evra hámark á reikikostnað sem er í gildi innan EES og ver neytendur fyrir háum bakreikningum.
Í tilkynningunni segir að verð fyrir farsímanotkun sé talsvert hærra í Rússlandi en innan EES-svæðisins og er ferðalöngum ráðlagt að hafa samband við farsímafyrirtæki sitt og fá ráðleggingar um hvernig sé best að haga farsímanotkun bæði hvað varðar símtöl, smáskilaboð og netnotkun.