800 manns í sendiráðinu í Berlín

„Þetta var ótrúlegt,“ segir Martin Eyjólfsson, sendiherra í Þýskalandi, en 800 manns mættu á sameiginlegt stuðningssvæði sendiráða Íslands og Danmerkur til að horfa á leik Íslands og Argentínu.

„Hér voru tvö til þrjú hundruð Íslendingar, um hundrað Danir og á milli fjögur og fimm hundruð Þjóðverjar,“ segir Martin en eins og fram hefur komið í fjölmiðlum er áhugi Þjóðverja á íslenska liðinu gríðarlegur. 77 prósent Þjóðverja styðja Ísland sem lið númer tvö í keppninni.

„Við áttum von á 500 manns og þurftum að vísa fólki frá, en sem betur fer ekki mörgum,“ segir Martin og bætir við að stemningin hafi verið ótrúleg.

Spurður hvernig staðan hafi verið þegar Argentínumönnum var dæmd vítaspyrna segir Martin að fólk hafi haldið í litla von á því augnabliki, en markvörslu Hannesar hafi verið fagnað líkt og sigurmarki.