Áhugi á Íslandi og íslenska landsliðinu í knattspyrnu hefur margfaldast eftir að heimsmeistaramótið í knattspyrnu fór af stað.
Mikil umræða hefur átt sér stað á samfélagsmiðlum auk þess sem greinum á erlendum miðlum hefur stórfjölgað, að því er fram kemur í ítarlegri umfjöllun um HM í Morgunblaðinu í dag.
„Það eru mjög margir að deila og skrifa efni í kringum landsliðið og þetta mót. Við höfum t.d. séð að um 3.000% fleiri eru að tala um landið á Facebook en síðustu helgi,“ segir Daði Guðjónsson, forstöðumaður ferðaþjónustu og skapandi greina hjá Íslandsstofu, og bætir við að ef vel gangi á mótinu muni áhuginn aukast enn frekar.