Bústaður biskups fluttur

Bústaðnum, þar sem vígslubiskup í Skálholti hefur ávallt haft búsetu, verður breytt í þjónustuhús fyrir ferðamenn og gesti Skálholtskirkju. Biskup fær í staðinn aðsetur í svokölluðu rektorshúsi.

Þjónustuhúsið, sem verður fyrir gesti kirkjunnar og ferðamenn, kemur í stað gestastofu. „Það var sett upp gestastofa á hlaðinu sem hefur ekki virkað nægilega vel, þess vegna var farið í þessar breytingar núna,“ segir Kristján Valur Ingólfsson, vígslubiskup í Skálholti, í Morgunblaðinu í dag.

Hann vonar að hægt verði að byrja framkvæmdir í haust. Þá verði þeim lokið næsta sumar. Önnur þjónusta er enn til taks á svæðinu.