„Þetta er fyrir þetta landslag sem ég skapaði í Vallanesi. Þetta var náttúrulega auð jörð, engin tré, engir akrar og ekki neitt þegar ég kom 1979,“ segir Eymundur Magnússon, bóndi í Vallanesi á Fljótsdalshéraði.
Um helgina vann hann til verðlauna á viðburði á Norður-Ítalíu fyrir störf sín við lífræna ræktun í Vallanesi. Þrenn verðlaun voru veitt á viðburðinum, sem ber nafnið „Bylting matjurtagarðsins“. Viðburðurinn var haldinn í Piemonte á Ítalíu dagana 22.-23. júní. Fyrir honum stóðu Matarvísindaháskólinn Pollenzo í Piemonte, Slow Food-samtökin og Ceretto-víngerðin í Alba á Ítalíu.
Eymundur hlaut verðlaun fyrir ræktun skógar og skjólbelta í landbúnaði auk þess að hafa skapað skilyrði fyrir sjálfbæra matvælaframleiðslu. „Það er nýtt að veita framleiðendum verðlaun og ég verð fyrir valinu sem þessi skrítni bóndi á Íslandi.“
Sjá viðtal við Eymund í heild í Morgunblaðinu í dag.