Ný lágvarmavirkjun var opnuð á Flúðum í dag af Guðlaugi Þór Þórðarsyni, utanríkisráðherra, og Ann Linde, utanríkisviðskipta- og Evrópumálaráðherra Svíþjóðar. Virkjunin byggir á nýrri sænskri tækni og stefnt er að opna tuttugu slíkar virkjanir á næstu þremur árum. Þetta kemur fram á vef Stjórnarráðsins.
Linde sem stödd hér á landi í vinnuheimsókn og ræddu ráðherrarnir meðal annars á fundi sínum stöðu alþjóðaviðskipta, Evrópusamstarfs, útgöngu Breta úr Evrópusambandinu og samstarf Norðurlanda.
„Tengsl Íslands og Svíþjóðar eru sterk og norrænu gildin eru grundvöllur náins samstarfs á alþjóðavettvangi. Við erum sammála um að tækifæri til aukinna viðskipta milli ríkjanna séu mikil og er jarðvarmastöðin á Flúðum dæmi um það. Hún tvinnar saman sænska tækni og íslenska orku og opnar mikla möguleika á frekari nýtingu á lághitasvæðum,“ sagði Guðlaugur Þór að loknum fundi ráðherrana.
Lágvarmavirkjunin er í landi Kópsvatns í Hrunamannahreppi og byggist hún á nýrri sænskri tækni. Verkefnið er samstarf Varmaorku og sænska fyrirtækisins Climeon sem framleiðir búnað til virkjunar lághitasvæða sem áður var ekki hægt að nýta til orkuframleiðslu.