„Við fylgjumst mikið með en reynum að hafa ekki áhyggjur,“ segir Brynja Ýr Baugsdóttir en hún á von á öðru barni sínu á allra næstu dögum. Brynja verður komin 39 vikur á leið á morgun og segist því eiga von á barninu á hverri stundu.

„Ég stefni á að fæða á Landspítalanum en veit varla hvað er í boði. Það er verið að tala um að senda einhverjar á Akranes,“ segir Brynja en engin lausn virðist í sjónmáli í kjaradeilu ljósmæðra við ríkið sem hefur staðið mánuðum saman. „Óvissan er mikil.“

Brynja segist vera nokkuð róleg miðað við þær sem eigi von á sínu fyrsta barni á allra næstu dögum. „Ég sé að margar í bumbuhópnum á Facebook hafa miklar áhyggjur, sérstaklega konur sem eiga ekki barn. Ég veit svona nokkurn veginn hvað ég er að fara út í.“

Brynja og kærasti hennar, Stefán Guðberg Sigurjónsson. Ljósmynd/Aðsend

Tólf ljós­mæður létu af störf­um á sunnu­dag og eiga upp­sagn­ir fleiri ljós­mæðra að taka gildi um kom­andi mánaðamót. Þá hafa ljós­mæður boðað yf­ir­vinnu­bann sem mun hefjast um miðjan júlí­mánuð ef lausn finnst ekki á deil­unni.

Styðja ljósmæður heilshugar

„Núna vill Landspítalinn að maður fari heim sem fyrst og ég treysti mér í það ef allt gengur vel. Sumar treysta sér kannski ekki í það,“ segir Brynja.

Brynja og aðrar í bumbuhópnum á Facebook vonast til þess að ljósmæður standi á sínu og fái það sem þær eigi skilið. „Við styðjum ljósmæður að sjálfsögðu. Það ríkir gremja út í ríkisstjórnina og þá sem stjórna að láta þetta fara svona langt.“

Tengdar fréttir

Kjaradeilur heilbrigðisstarfsfólks

Fátt jafn óheppilegt og deilur inn í viðkvæma starfsemi

• Sömdu við borgina
• Hjúkrunarfræðingar samþykktu miðlunartillögu
• Virkt samtal á tveggja stunda kynningarfundi
• „Áttuðu sig á hve illa verkfallið myndi bíta“

» Fleiri tengdar fréttir

• Blogga um frétt