Mannbjörg á Héraðsflóa

Mannbjörg varð þegar eldur kom upp í bát á Héraðsflóa á þriðja tímanum í dag. Stjórnstöð Landhelgisgæslunnar barst neyðarboð frá bátnum en samkvæmt fyrstu upplýsingum var báturinn sokkinn.

Einn var um borð í bátnum og tókst honum að komast í björgunarbát, samkvæmt upplýsingum frá Landhelgisgæslunni.  TF-SYN, þyrla Gæslunnar, var við leit að meintum ísbirni á Melrakkasléttu þegar tilkynning um slysið barst og var áhöfn hennar þegar í stað beðin um að halda á vettvang.

Frétt af mbl.is

Bátur sökk á Héraðsflóa

Rétt rúmum hálftíma eftir að TF-SYN var kölluð út var var búið að hífa manninn um borð í þyrluna, úr björgunarbátnum. Aðstæður til björgunar á Héraðsflóa voru góðar og var maðurinn við góða heilsu. Þegar þyrlan hélt af vettvangi logaði enn eldur í bátnum. TF-SYN flutti manninn til Egilsstaða og lenti þar um klukkan 16.

• Blogga um frétt