Efnt hefur verið til samstöðufundar með ljósmæðrum við húsnæði ríkissáttasemjara í dag. Samninganefnd Ljósmæðrafélagsins fundar með samninganefnd ríkisins í dag og líkt og fyrir síðasta fund sem fram fór fyrir sex dögum verður blásið til samstöðufundar fyrir samningafundinn.
„Við endurtökum leikinn og sendum samninganefnd ljósmæðra inn á fund ríkissáttasemjara fullar af gleði og samstöðuafli,“ segir í tilkynningu frá stuðningshópi ljósmæðra. Fundurinn hefst klukkan 13:40, tuttugu mínútum áður en samningafundur hefst klukkan 14.
Ljósmæður lögðu fram tilboð fyrir samninganefndina á síðasta fundi en Katrín Sif Sigurgeirsdóttir, formaður samninganefndar ljósmæðra, sagði að samninganefndin hefði svarað því til að ekki væri hægt að ganga að þeim kröfum eins og þær væru settar fram. Þráðurinn verður tekinn upp að nýju á fundinum í dag.
Uppsagnir 12 ljósmæðra á Landspítalanum tóku gildi um mánaðamótin og þá samþykktu ljósmæður yfirvinnubann sem tekur gildi eftir helgi.
„Sú staða er því komin upp að lífi og heilsu mæðra og ófæddra sem og nýfæddra barna er sett í hættu og því komið þungt hljóð í fólk. Kvíði er farinn að einkenna þessa stund í stað eftirvæntingar og gleði,“ segir í tilkynningu frá stuðningshópi ljósmæðra, sem hvetur fólk til að standa „með þeim sem standa við hlið okkar á okkar viðkvæmustu tímum og krefjumst leiðréttingar launa og öryggi okkar sem fæðum börn í þennan heim.“
Nánari upplýsingar um samstöðufundinn má nálgast hér.