Þokkaleg spá fyrir Laugavegshlaup

Þátttakendur í Laugavegshlaupinu sem fer fram á morgun mega búast við þokkalegu veðri og aðstæðum. Spáð er rigningu í upphafi hlaups í Landmannalaugum og á Hrafntinnuskeri en eftir því sem líður á hlaupið ætti að birta til.

Samkvæmt Önnu Lilju Sigurðardóttur, upplýsinga- og samskiptastjóra Íþróttabandalags Reykjavíkur, er snjór á Hrafntinnuskeri líkt og vanalega og krapi á einhverjum tímapunkti leiðarinnar. Anna segir það þó vera venjuna á þessu svæði og að hlaupararnir ættu að vera því vanir.

Þorbergur Ingi Jónsson á þrjá bestu tíma Laugavegshlaupsins. Ljósmynd/Þórarinn Sigurbergsson

Anna segir morgundaginn leggjast vel í sig. „Við fengum nýja veðurspá í morgun sem er aðeins bjartari en þær sem við höfum verið að fá. Það verður smá sól í lokin og aðeins minni vindur þannig okkur lýst bara vel á þetta.“

Alls eru 555 keppendur skráðir í mótið að þessu sinni sem er metfjöldi. Þeirra á meðal er Þorbergur Ingi Jónsson sem á þrjá bestu tíma hlaupsins. Þorbergur kemur til með að hlaupa sitt fimmta Laugavegshlaup á morgun en hann sló tímametið árið 2015 þegar hann hljóp á 3 klukkustundum og 59 mínútum.

Frétt af mbl.is

Setti nýtt met í Laugavegshlaupinu

Auk Þorbergs eru tveir erlendir hlauparar, einn Svíi og einn Finni, sem þykja sigurstranglegir. „Okkur sýnist þeir vera bestir þó að maður viti náttúrulega aldrei.“ Anna segir að á morgun eigi ekki að vera jafn hvasst og var í fyrra og þar af leiðandi aldrei að vita hvort að tímametið verði slegið að nýju.

Hlaupið verður ræst í fyrramálið klukkan níu og gert er ráð fyrir því að fyrstu keppendur í karlaflokki detti í mark um klukkan eitt og fyrstu keppendur í kvennaflokki um klukkan tvö.

• Blogga um frétt