Maður í annarlegu ástandi var handtekinn við gatnamót Reykjanesbrautar og Miklubrautar um klukkan þrjú í nótt. Hafði maðurinn þá verið að ganga fyrir umferð ökutækja sem þar áttu leið um.
Þetta kemur fram í tilkynningu frá lögreglu, en þar er maðurinn sagður hafa verið vistaður sökum ástands í fangageymslu lögreglunnar.
Alls voru níu bifreiðar stöðvaðar á höfuðborgarsvæðinu í gærkvöldi og í nótt, þar sem viðkomandi ökumenn voru ýmist grunaðir um akstur undir áhrifum áfengis, vímuefna, eða hvors tveggja í senn.
Einn ökumannanna var að auki grunaður um að hafa stungið af frá umferðaróhappi, og enn annar var grunaður um brot á vopna- og lyfjalögum. Þriðji til viðbótar keyrði um á ótryggðu ökutæki og voru skráningarmerki þess því klippt af.