Bandarískur karlmaður á sjötugsaldri var fyrir helgi dæmdur í tveggja mánaða skilorðsbundið fangelsi og var sviptur ökuréttindum í 10 mánuði fyrir manndráp af gáleysi með því að hafa orðið valdur að banaslysi á Suðurlandsvegi í maí á þessu ári.
Í dómi héraðsdóms kemur fram að maðurinn hafi játað skýlaust að hafa gerst sekur um að hafa valdið slysinu. Hins vegar kom fram í farbannsúrskurði yfir manninum að hann hafi neitaðí skýrslutöku hjá lögreglu að hafa ekið bíl sínum á öfugan vegarhelming. Var niðurstaða bíltæknirannsóknar sú að orsök slyssins yrði ekki rakin til ástands ökutækjanna, heldur hafi niðurstaða rannsóknar leitt í ljós að maðurinn hefði ekið bifreið sinni inn á öfugan vegarhelming og í veg fyrir hina bifreiðina með þeim afleiðingum að áreksturinn varð.
Þá kom fram í úrskurðinum að framburður mannsins væri í veigamiklum atriðum í ósamræmi við önnur rannsóknargögn lögreglunnar.
Fyrir dómi viðurkenndi maðurinn hins vegar brot sitt samkvæmt ákæru. Þá kom einnig fram í dóminum að maðurinn hafi náð samkomulagi um greiðslu miskabóta og var því bótakrafa í málinu felld niður.
Taldi dómurinn tveggja mánaða skilorðsbundið fangelsi vera hæfilega refsingu. Meðal annars var vísað til þess að atvikið hafi haft gríðarleg áhrif á heilsu mannsins. Það var staðfest með læknisvottorði.
Konan sem lést í slysinu lét eftir sig eiginmann, tvö börn og eitt barnabarn.