Ein ljósmóðir á meðgöngu- og sængurlegudeild Landspítalans hefur dregið uppsögn sína til baka og búast má við því að fleiri geri slíkt hið sama fyrir helgi. Atkvæðagreiðslu ljósmæðra um miðlunartillögu ríkissáttasemjara lauk í hádeginu og var tillagan samþykkt með miklum meirihluta.
Að sögn talsmanns Landspítalans var niðurstaða atkvæðagreiðslunnar mikill léttir fyrir spítalann. Ekki er gert ráð fyrir því að allar þær sem sagt hafa upp dragi uppsagnir sínar til baka.
Miðlunartillaga ríkissáttasemjara var samþykkt í atkvæðagreiðslu Ljósmæðrafélagsins með 95,1% atkvæða. 247 voru á kjörskrá og greiddu 224 atkvæði, eða 91%. Hún felur meðal annars í sér að ríkissáttasemjari mun skipa þriggja manna gerðardóm sem ætlað er að fara yfir laun ljósmæðra.