Katrín Tanja Davíðsdóttir er enn í fjórða sæti eftir fyrstu æfingu síðasta dags heimsleikanna í crossfit. Leikarnir fara fram í Madison í Wisconsin í Bandaríkjunum. Björgvin Karl Guðmundsson og Annie Mist Þórisdóttir eru bæði í fimmta sæti í sínum flokkum.
Katrín Tanja náði öðru sætinu í fyrstu æfingu dagsins, en þar þurftu keppendur að klára fimm umferðir af hlaupi, æfingu á hjóli og með sleða.
Önnur æfing dagsins hófst klukkan 19 að íslenskum tíma og er hægt að fylgjast með henni í beinni hér að neðan.
Síðasta æfing heimsleikanna hefst svo klukkan 20:35 að íslenskum tíma en ekkert liggur fyrir um æfingarnar á þessum tímapunkti.
Efstur í karlaflokki er Mathew Fraser með 1.062 stig, Patrick Vellner er í öðru með 870 stig og Lukas Högberg í þriðja með 836 stig. Björgvin Karl er með 778 stig en 100 stig fást fyrir fyrsta sætið í hverri grein og því nóg af stigum eftir í keppninni.
Sömu stigareglur gilda í kvennaflokki þar sem Tia-Clair Toomey er með 1.000 stig. Laura Horvath er í öðru með 914 stig og Kara Saunders með 872. Katrín Tanja er með 852 stig og Annie Mist með 758 stig.