Skipt verður um aflspenni í aðveitustöð Rarik í Hveragerði síðdegis í dag. Frá því seint í gærkvöldi hefur verið keyrt á varaafli og kerfi Rarik frá Selfossi og Þorlákshöfn.
Rafmagn fór af Hveragerði um klukkan 15 í gær en var komið á hjá öllum bænum um miðnætti. Síðan þá hefur verið keyrt á varaafli.
Samkvæmt upplýsingum frá Rarik kom upp bilun í aflspenni í aðveitustöðinni í Hveragerði þegar rafmagnsstrengur var grafinn upp. Fyrirtækið veit ekki af hverju þetta gerðist en segir að spennir, sem hefði átt að þola bilunina, hafi slegið út.