„Sumir draga mjög lengi að láta jarðsetja duftker látinna ástvina, en þetta hefur þó stórlagast,“ sagði Þórsteinn Ragnarsson, forstjóri Kirkjugarða Reykjavíkurprófastsdæma, en Morgunblaðið hafði samband við hann til að kanna stöðuna.
Fyrir fjórum árum var blaðið með ítarlega umfjöllun um málið, en brögð eru að því að það dragist úr hófi fram að láta jarðsetja kerin og safnast þau þá upp í geymslum kirkjugarðanna. Dæmi hafa verið um að duftker hafi beðið jarðsetningar um árabil.
„Algengur misskilningur er að gengið sé frá jarðsetningu sjálfkrafa eftir útförina og fólk hugar síðan ekkert meira að því. Við höfum verið að reka svolítið markvisst á eftir þessu og þetta fer að komast í viðunandi horf en við erum ekki alveg ánægð ennþá,“ segir Þórsteinn í Morgunblaðinu í dag.