Heljarinnar ísjaki fyrir vestan

Tignarlegur borgarísjaki er strandaður á hundrað föðmum úti á reginhafi.
Tignarlegur borgarísjaki er strandaður á hundrað föðmum úti á reginhafi. Ljósmynd/Þröstur Njálsson

Myndarlegur borgarísjaki varð á vegi áhafnarinnar á Engey RE-1 norðan við Ísafjarðardjúp í gær. Ísjakar af þessari stærð eru ekki óalgeng sjón á þessum miðum um þessar mundir.

Borgarís þessi var strandaður á hundrað faðma dýpt, sem eru um 200 metrar. Má því ætla að ísjakinn sé ógnarstór, hátt í 20 metrar á hæð, eða á stærð við átta hæða íbúðablokk í Reykjavík.

Þröstur Njálsson, sjómaður og áhugaljósmyndari, sendi mbl.is mynd af jakanum. „Við höfum bara séð þennan eina núna. Þetta er nú samt venjuleg sjón hérna fyrir vestan,“ segir Þröstur.

Halldór Björnsson, sérfræðingur á Veðurstofunni, tekur í sama streng. „Borgarís er mestur síðsumars hér við landið. Um sama leyti og venjulegur hafís hopar mest, er borgarísinn mestur,“ segir hann og áréttar muninn á tveimur gerðum hafíss: borgarísinn brotnar af þykkum íshellum og flýtur stundum langa leið; hafís verður til á íshafi og er mun minni í sniðum.

Tindurinn á ísjakanum stendur upp úr hafinu. Hann er ekki nema 10% af ísjakanum sjálfum. Því er vitað að undir yfirborðinu er hátt í tífalt stærra ferlíki úr ís. 

mbl.is